昨日說到認得仔倌人麼，就好做交關別格事體哉，有人說「阿是哪末好睏哉」，倪只好說「覅要實梗急囁」，還有交關過門、竅坎得來。認得仔倌人，要經常去走動走動，說說閑話，吹吹牛屄，一點亦急勿得格。

　　若然兩個人談下來還可以，彼此有點意思麼，就要請客哉，請客亦叫「擺臺面」，就是擺仔臺子上菜，還有種更加通俗格叫法是「喫花酒」，顧名思義麼就是有「花」格酒嘍。喫一桌酒，價鈿為一個「花頭」，實際浪是一種計量單們。 1930 年代，一個「花頭」是 12 塊銀洋鈿。

　　喫酒麼，嘸啥客人搭仔倌人兩個人喫格，上轉說到同鄉、朋友要碰頭麼，「長三」堂子頂好，所以現在擺仔酒麼，就是為了請同鄉、朋友格。於是麼，要寫請客票子，上面寫「啥人啥人勒啥場化請啥人啥人」等等，專門有堂子裏格底下人送得去，關點客人，多麼亦勒自家相好格堂子，要麼勒拉客棧或是府浪，請得來仔麼，打個招呼，坐下來。

　　格麼，客人齊仔麼，阿是就要喫飯哉？勿要實梗格，耐想請客朋友有仔倌人陪，關點客人全是一個人來格，阿有啥請介許多「電燈泡」格呀？客人到仔麼，就要去拿倌人請得來陪陪，哪麼堂子裏還有專門格「叫局」票子，寫「請啥場化啥人來侑酒」，票子送到別格堂子裏，倌人接著仔來麼就叫「出局」；如果有格堂子不止一個倌人，有種客人正好亦是相好，叫仔該格麼就叫「本堂局」，勿然麼叫「客局」。

　　上轉說到「打茶圍」是洋鈿三塊，倌人出局麼亦是洋鈿三塊，兩個三若然要畫出來麼，就是一張骨牌「長三」，所以關種倌人叫做「長三」，關搭就是出典。

　　擺花酒、出局格名堂有叫關得來，倌人來仔麼，就坐勒客人後頭，唱唱曲子，陪客人說說閑話、吃吃酒，照理麼，啥人叫格就陪啥人，不過亦有例外。譬如張三這個該個倌人，啥曉得伊亦認得李四，而且搭李四還更其要好點得來，李四問張三討得來，坐勒李四後頭，格麼叫「轉局」，局鈿麼由李四付，張三麼再叫一個。

　　還有花頭麼叫「翻臺」，如果一個人請客，叫仔四五個朋友，喫脫仔一頓還想喫麼，其中一個客人說到俚哚相好關面，於是大家跟過去，或者有幾個勿去，或者再叫幾天，過去仔再擺一臺酒，再重新「叫局」麼，就叫「翻臺」。耐勿要看實梗，開銷蠻大得來，一夜天喫格三四臺酒，就算叫一個人麼，勿算出一趟局格，喫幾臺，算幾個局，一個局就是三塊，一夜天光是別人請客麼亦要搞落蠻多。

　　今朝辰光勿多，下轉再說該個花酒到底有點啥喫，哪哼喫法。

　　昨日說到鄉上人到仔上海，要交朋友、談生意嘸沒場化好，衹有堂子是個選擇，大家一淘來看看吧。要到堂子去，勿是說去就去格，定規要有個「懂經」朋友帶得去。若是嘸沒朋友帶，對勿起，只好到「么二」堂子去，「長三」堂子去勿得格。

　　為啥實梗說呢？關點「長三」堂子，派頭一絡，家家弄得象住家一樣，樓上樓下，客堂廂房，亦有娘姨、傭人，耐一個跑到關面，踏進仔門麼總要攀談格落，蘇北娘姨問耐「先生辣塊來的啊？找辣一鉤啊？」，耐總勿見得說「我是來嫖堂子格，看看啊有啥好看格妓女」，關種樣子，一看就是鄉下剛剛上來，定其撥娘姨趕仔出去。

　　「長三」堂子，講究格是風雅，即使嫖麼亦要象談朋友實梗慢慢談起，說來倒亦奇怪，關歇辰光就算妓女勿勿少少，但是高檔妓女還是供不應求，所以不是倌人討好客人，倒有交關辰光是客人去巴結倌人。

　　繼續說下去，要去「長三」關面囁定其要有格朋友帶得去，或是兩個人，或是三個人，也許更加多幾個，到「長三堂子」去，哪怕娘姨認得俚哚，進得門去上樓格辰光麼，相罵就會喊起來「陳大老爺來哉」或是「鳳二少爺來哉」，於是房間裏格倌人末立起身，走到門口迎進來，大家坐下仔麼，認得格客人拿勿認得格介紹撥倌人，就算認得哉，若是感興趣麼，下轉亦可以自家走動走動。

　　大家坐下來仔，倌人會端點瓜子得來，大姐、娘姨們泡仔茶來，倌人捧上敬茶，哪麼抓一把瓜子放勒客人手裏，該格麼就叫「裝幹濕」，幹格是瓜子，或是別格小零食，濕格麼就是茶哉。客人聊仔幾句麼，可以煙榻浪躺一躺，喫得一筒煙；後來禁仔鴉片麼，改喫水煙筒。

　　該格麼就叫「打茶圍」，要搞落三塊洋鈿，過去格資料上全嘸沒寫到底是一個客人三塊，還是總共三塊，不過細細一想麼，定規是帶頭格客人出仔三會全部勒嗨哉，否則格說話麼倌人格銅鈿亦太嫌好賺則啘。

　　打茶圍勿能一徑「打」下去，坐脫歇大家認得仔麼就結束哉，勿是老相好，一般只坐個一刻鍾、半個鐘點，關個茶圍亦不是喫自助餐，定其要喫出本鈿來，實梗說仔吧，關歇外國人店裏，一塊銀洋鈿九道大菜，光是喫茶喫瓜子要喫出本鈿來，勿曉得要喫到啥辰光得來。所以，所謂格「打茶圍」麼無非是北方人講格「套套近乎」，擺擺闊氣罷哉。

　　打仔茶圍，認得仔，哪麼可以有別格事體哉。

　　哪末好哉，說脫仔「書寓」麼剩下來就容易多了，除脫仔「弄勿清爽到底阿算妓女」格「說書先生」，檔次頂高格就算「長三」勒，反正到了後來，「說書先生」麼亦只剩「先生」勒，「書寓」麼亦成了「堂子」格代名詞，「長三書寓」變成了一個詞，專門指「長三」格種高檔妓女。聽倪從頭說起吧！

　　鴉片戰爭後，一方面清朝政府嘸沒用場，人們逐漸失去信心，於是交關讀書人心灰意冷，覺著做官勿是出路，不過把功名掛著，以便不時之虛而已。另一方面，上海、天津等地，門戶開放，越來越多格外國貨湧進通商口岸，亦帶來了許許多多格外國思想。

　　特別勒浪上海格種場化，租界建立了起來，亦需要交交關關各式各樣格人才，於是各地格人全想到上海來尋生意，而勿是想到北京去做官，上海於是成為「冒險家格樂園」。

　　關歇辰光，鄉下格殷實之家，全想到上海來碰碰運道，過去格人，特別勒浪鄉下，成家早，一般男人到了十九歲，廿歲出頭，全已經討仔家小了，交關亦已經養仔兒子了，身後無事，亦有銅鈿，全想到上海長長見識。

　　常州、湖州、太倉、無錫、南京等地，離上海近，語言亦通，所以關搭地方格人，到上海格有勿勿少少。有銅鈿人帶點替換衣裳，帶個底下人，拿點銀票麼就到上海來了，關歇交通已經蠻發達了，周邊地區衹要一天半天就可以到格。

　　到仔上海麼，借間客棧，一住麼就是幾個月，反正汰衣裳、燒小菜實梗格整體，衹要有銅鈿麼，一點用勿著自家擔心，客棧全可以解決，實際上就像現在格酒店式公寓，一應食宿全有人照顧哉。住下來仔麼，就要去尋同鄉哉，如果同鄉嘸沒勒哚上海「做人家」格話麼，亦是住勒客棧裏，尋著仔同鄉麼，總歸要一道聊聊天，白相相。歇仔幾日麼，同鄉再介紹點朋友認得認得，圈子就實梗形成格。做生意麼，就要圈子呀，有仔圈子麼，樣式全好辦哉啘。

　　擺勒眼面前格問題麼，客棧終究是客棧呀，小小格一間，亦嘸沒辦法大請客，哪麼那哼辦法囁？

　　飯店亦可以，不過飯店麼有諸多不宜，譬如說約勒飯店，耐麼約仔六個朋友，另外麼亦有一檔朋友約耐，哪麼作孽哉，耐等俚，俚等耐，人勿齊麼勿好開飯格啘，關歇亦嘸沒啥格手機囉挺格，哪麼只好幹等，假使有羅俚一位格個肚皮瀉，大家白等，連飯都開勿去，倒要問耐那哼去喫下一頓？下一頓囁，依然要等，實梗日日等，頓頓等，恐怕大家全喫勿消，格麼還有個場化好去，就是「長三堂子」，明朝繼續。

　　上轉寫仔一篇「咸水妹」麼，勿曉得哪哼格搞頭勁，突然之間寫勿下去哉，耐想呀，該點麼事倪又朆親眼看見，亦沒親身體驗，格麼需要幾幾花花資料，啥曉得尋來尋去，要寫格該篇麼還是衹有一點點資料，倪迭人，勿歡喜瞎說，實梗勒麼等仔長遠再動筆。

　　到底難勒羅搭囁？難就難勒「書寓」浪廂。大家可能聽說過一種說法，叫做「長三書寓」，聽上去麼象「長三」哚格「書寓」，其實勒浪頂頂早格辰光麼，書寓是書寓，長三是長三。聽倪慢慢說來。

　　上海灘浪，叫高級格妓女為「倌人」，迭格詞生得格意思是指「套馬車格人」，迭個意思明顯搭勿著妓女格邊，看樣子還有別樣出典。蘇州人叫自己老公為「官人」，迭個其實勒浪昆劇、京劇裏亦有格，該搭格「官人」麼就是做官格人，過去全是「望夫成龍」，就算自家男格勿是做官格麼，亦要望俚做官，叫俚「官人」麼實際浪是個口彩，耐說阿有趣。

　　關歇辰光，做官格出門，般有轎子勒、隨從勒，據說該歇辰光妓女出局麼，亦是風風光光，就像做官格出門，派頭十足，於是大家尋開心亦叫她們官人，為了和正式做官格有所分別麼，加個該（倚）人旁，叫做「倌人」。

　　頂早格辰光，關點「倌人」全是「書史（說書倌人）」或是「詞史（詩詞倌人）」，據說歷史可以追溯到千把年前格「女樂」或者「樂府」得來。倪麼從十九世紀五十年代開始說起，鴉片戰爭以後，上海門戶開放，外國人來勒，外地人亦來了，到仔上海迭個「冒險家的樂園」來「討生活」，關歇倪，有種女人，會得彈彈琵琶，會得說書、唱彈詞，亦會唱昆曲搭仔小調，交關受人歡迎。

　　該點說書格女人麼，就像現在電影明星，個個標致勒時髦，夜裏說書格辰光，書樓外掛起紅紙頭，寫仔說書倌人格名字，實實鬧猛，若要點唱麼，是一塊洋鈿（折 56.5 元人民幣），耐去想，收入阿要好得來。

　　不過麼，銅鈿亦勿是實梗好賺格，關歇亦勿行「假唱」格，完全是憑真價實貨唱格，勿單如此，關歇辰光（ 19 世紀早期）還有專門格考核，要比各人格唱開篇、說白以及操弦格本事，通過仔勒再好說書得來。

　　蘇州人叫教書格麼「教書先生」，說書格麼「說書先生」，關點女人說仔書麼，依然叫「說書先生」，

　　書寓，過去有交關人一直理解為是「讀書人住格地方」，認為是俚哚冒充讀書人，實際浪該種理解是錯格，書寓麼就是「說書先生」住格場化。說書先生除脫勒浪書場說書之外麼，亦在書寓裏接待文人學士，實際浪就是有銅鈿人啦。書寓裏佈置得相當漂亮，並且還有煙片鴉請客人喫，不過從所有格資料來看，關歇點格「說書先生」門第管教森嚴，是「賣藝勿賣身」格，據說啥人要是搭心上人勾勾搭搭「勿入調」麼，要「一經發現，必焚其臥具，掃地出門」。

　　看看是蠻好，有實梗格高貴女人，但是倪亦有疑問哉，關歇點實梗格「先生」全是守身如玉麼，哪哼解決個人問題囁？總勿見得個個一生一世做黃花閨女，不過該方面格資料麼一點亦分（沒）尋著，亦不曉得是停仔生意嫁人囁，還是暗底裏有男人格。

　　實梗格問題麼，只好留撥仔歷史學家去考證哉，其實真正「賣藝勿賣身」格「書寓」生得亦嘸沒多少辰光，隨著「長三」格興起，盜用仔「書寓」格名稱，就一發不可收拾了，弄得到了二十世紀二十年代，所有的「書寓」其實已經全部是「長三」了。

　　關點女人勿會說書，只會做女人，於是大家把「說書先生」格「說書」兩個字去脫，只剩「先生」，成為妓女格特有稱呼。

　　倪用蘇白寫仔幾篇「上海閑話」，主要是介紹介紹老上海格舊事體，並且連帶說說上海格方言，有人問倪，既然說上海麼，為啥勿用上海閑話，偏偏要用蘇州閑話，個中格原因麼以前已經說過，該搭勿再囉嗦哉。其實既然可以用法文介紹英國，為啥就勿可以用蘇州閑話來說說上海囁？

　　倪格文章麼勒啦網浪連載，居然有個「勿識頭」廣東人說倪用格是「低等語言」，閑話很勿好聽，該浪只好算俚自取其辱哉。生得語言是分上中下等，至於什麼「眾生平等」嘍、「語言無貴賤」嘍，大家亦曉得是騙騙人格呀。倪想，除脫仔佛家是真真相信麼，其他點人勒浪說平等格同時，已經是勿平等格立勒仔別人肩胛浪哉。

　　格末蘇白到底是哪哼格語言囁？實頭對勿住俚個廣東「勿實頭」哉，老實對耐說仔吧，關歇格辰光麼，蘇州閑話就是上等人用格，蘇州口音不單是血統格象徵，亦是身份格代表，別格勿去說俚，就算到仔後來開國大典麼，宋慶齡還是用吳儂軟語做格演講，耐說到底啊上得了臺面？

　　勿單蘇州閑話勒老上海是上等人用格，就算妓女麼，亦是蘇州人來得比別場化地方格人檔次高勿勿少少得來。美國斯坦佛大學格 Gail B. Hershatter 勒哚俚格著作 Prostitution and Modernity in Twentieth-Century Shanghai 中說到「妓女的原籍也是決定娼妓業等級的重要因素」，並且特別指出「蘇幫雄視業界」，其它如 Morris 的 Chinese Daughters of the Night ， Lemi è re 的 The Sing-Song Girl: From a Throne of Glory to a Seat of Ignominy 以及 James Hundley Wiley 的 A Study of Chinese Prostitution 中亦有相應格說法。

　　俚哚格著作中還提到各式別場化格妓女也「強效蘇白，至少用蘇州口音裝點門面，冒充蘇幫。」關歇辰光，上海格妓女，有名格全是來自蘇（州）、（無）錫、常（州），該點小娘仵從小學格就是蘇白，所以全是說蘇州閑話格。非單勒上海，關歇辰光哪怕全國麼，亦是蘇州妓女喫香，有點妓女勒浪上海混多混勿下去，啥曉得到仔天津麼就因為會說蘇州話，紅是紅得來發紫囁。亦有點揚州妓女，勿會說蘇白，只好到北面去，用江北閑話冒充蘇白，欺瞞聽勿懂格人，照樣生意要比當地人好得來。

　　有人說，北方場化麼南方妓女少，物以稀為貴麼所以蘇州人受歡迎，格倒亦不是實梗說，廣東妓女勒上海人數亦勿多，哪哼就嘸沒「貴」起來囁？

　　關歇辰光上海格廣東妓女是哪哼格樣式呢？上海人毛祥麟著《墨餘錄》，說：「近歲 ( 指 1860 年前後 ) ……更有廣東流倡 ( 娼 ) ，與之雜處，妝飾異土著，不梳高髻，不系裙，不裹足，履無跟，飾無珠玉，恰能歌，雖不解其意，然靡靡之音，亦足動聽。人呼『咸酸梅』，蓋言品雖未佳，而亦可以解渴除煩，一若津津乎有餘味也。」，該段麼事譯成白話就是說關點廣東妓女大腳著雙拖鞋，會得唱麼大家亦聽勿懂，長得麼勿大好看，衹能勉強接接客。該搭格「咸酸梅」呢，亦有人說是「咸水妹」，吳研人寫格《二十年目睹之怪現妝》相信大家聽說過，裏廂麼就寫到外國人到仔中國要尋妓女，只不過金髮碧眼嘸沒人敢去搭訕，衹有廣東格船浪妹子麼膽子大，專門做「爛水手」格生意，海水麼是咸格，所以叫做「咸水妹」，以後便成了專接洋客格廣東妓女格名稱。

　　葛元煦《滬游雜記》卷二說：「咸水妹、老舉，粵妓寄居滬地者。招接洋人者為『咸水妹』，應酬華人為『老舉』。簪珥衣飾皆有分別。」麼就是一個證明。該搭格「老舉」一詞，說格是專門接華客格廣東妓女，連袁枚《隨園詩話》裏都有提到「廣東稱妓為『老舉』」，後來更是引申出上海話中一個極其不堪的詞，喚作「老舉三」，懂上海閑話格人，自然曉得是啥麼事了。

　　上轉說仔野雞，舊上海一種相當嘸沒檔次格妓女，啥曉得，還有比該種女人直實推扳格得來。

　　上海閑話裏，說女人勿好，有相當有趣格三個字，發音是一式一樣格。第一個字是「懶」，女人麼自然要勤快再好，過去，整天打瞌沖格女人是撥人家看勿起格。過去人家格囡仵麼，小辰光全讀歇過《女兒經》，第一句麼就是「女兒經，仔細聽，早早起，出閨門」，所以關歇辰光一個女人「懶」是交關大格罪名得來，「懶女人」亦算是一句蠻結棍格罵人閑話了。若是羅裏一個姑娘落仔實梗格名聲麼，只怕嫁人亦有點困難了。

　　「懶」是不賢惠，倒也罷了，一個女人若是不貞潔，麻煩就更大了。如果一個女人有交關男人，上海閑話就叫「濫」，「濫女人」比「懶女人」結棍得多，落裏一個女人若是得了「濫女人」格稱號，怕是難以翻身了。文化大革命時，革命小將深諳此道，但凡要弄聳落裏一個女人麼，就說俚「生活作風有問題」，哪麼該人女人就算一棍子打煞哉，關格辰光，有幾幾花花女人得之實梗一個稱號麼，上吊格亦有，跳樓格亦有。關歇有個著名格翻譯家，譯過《十日談》與《傲慢與偏見》格王科一，就是因為別人說俚哚女朋友「生活作風有問題」，該有翻譯家是個書毒頭，一時想勿通麼，開仔煤氣自殺了。

　　女人一濫，衛生堪憂，關歇辰光勿象現在，衛生醫療都有問題，「濫女人」難免勿「爛」，據 1941 年格上海《申報》統計，有 90% 格下等妓女生仔「花柳病」（性病），實頭是夠「爛」格了，交落關歇辰光，有銅鈿格男人，是絕對勿會去光顧下檔妓女格，怕都怕煞哉。

　　上海灘浪，罵女人頂頂難聽格，也是迭個「爛」字，叫做「爛污屄」，一般人是絕對說勿出口格，衹有下只角格男女才會使用，特別是女人，一般用到迭個詞相罵，離動手亦差勿多哉。女人相罵，頂結棍是國營企業格工人，特別是紡織局、儀表局流水線浪格工人，我曾經親眼見過，罵人之下作齷齪程度，我實在寫勿出來，當時我只不過是個廿歲出頭格小夥子，光聽俚哚相罵，就聽得面紅耳赤，可想而知。有人考證，「爛污」應該寫作「爛屙」，不過一家之言，勿勒該搭討論哉。

　　比野雞還要「濫」，加二「爛」格妓女是「花煙間」與「釘棚」格妓女。

　　關格辰光，十九世紀末，上海有交關人喫鴉片，有銅鈿人麼，自家屋裏有鴉片間，有煙榻、煙具，還有專門裝鴉片格丫頭，該種人麼，吃吃鴉片是根本喫勿窮格。有點丫頭加二標致，裝裝鴉片收仔房麼，亦勿勿少少得來。

　　還有點人，鴉片念（癮）頭蠻大，不過袋袋麼是蹩跌生絲，窮得溚溚滴，要喫鴉片麼只好到煙館裏去吞吞土皮，啥曉得就是格牌裏「老槍」，象個彎背老公公，一日到夜咳個勿停，人還勿象人得來，居然還要白相女人，只好到「花煙間「去了。

　　「花煙間」就是有女人格煙館，「花煙間」是推扳得勿得了格地方，房間又小又齷齪，亦嘸沒啥傢什，被頭麼臭烘烘格，亦不知關點老槍胃口哪能實梗好法。勒 1893 年格辰光，到花煙間喫大煙、白相女人，夯幫浪當衹要一百銅鈿，割著現在人民幣五塊六角五分；到了 1910 年以後，白天睏一趟是兩三角，「住夜廂」則要二塊銀洋鈿，比起 1932 年野雞格「一炮」一元（合四十塊人民幣出頭），是要便宜勿勿少少得啦。

　　關歇辰光，花煙間有牢明顯格標幟，俚搭鄰居房子格區別，在於俚勒浪門口有張梯子，關點女人勒浪嘸沒生意格辰光麼，就立勒門口，要麼坐勒梯子浪，嘴巴裏麼哼點象「十杯酒」實梗格婬調，等客人來麼，兩格人就朝樓浪一跳……

　　「跳老蟲」迭格詞，現在已經嘸沒人曉得域，到花煙間去嫖，就叫「跳老蟲」，有人認為就是關張梯子來格，勒梯子浪縱上蹦下麼就叫「跳」啘。但亦有人認為「這也是一種象形名詞，老蟲當然是象徵某些器官，此蟲無長勁，一跳即完，『跳老蟲』者言其快也。」（汪仲賢《上海俗語圖說》），倪想實梗促掐格閑話，定關是蘇州人想出來格，換仔上海人頂多叫仔「快餐」麼哉。

　　如果說「跳老蟲」促掐，啥曉得還有實實促掐點格咧，勒浪關歇辰光，有銅鈿人認為窮人嘸啥銅鈿，嘸沒仔銅鈿麼營養不良，人長不大，勿但人長勿大，就算關樣麼事麼亦要長得細小點得來，細小到哪哼呢？說是小得像隻「釘」，該種窮人「做功」麼就叫「打釘」。關歇勒浪閘北、虹口一帶，有交關簡陋格堂子，價鈿亦是交關便宜格，一炮一角，一夜一塊，關種地方就叫做「釘棚」。

　　1932 年出版格王定九寫格《上海門徑》中說，到釘棚去格全是點「頭腦簡單經濟力弱的勞工們」，搭仔現在格民工差勿多。

　　前兩日見報道，說有半老徐娘遊走於各個工地賣婬，一炮五塊、十塊，又見民工呼吁「我們要性生活，不要性講座」，哎，較之過去，猶有不堪，衹能一嘆了。

　　上轉說到四馬路浪格女人，分為幾等幾樣，有勿勿少少格檔次得來，哪麼到底有幾花式樣呢？聽倪一點點來說撥耐聽。

　　先來說說「野雞」，「野雞」格書面語言叫「雉」，該格字麼中國老歷八早就有了，《尚書大傳》中說「雉者，野鳥。」，而《說文》中亦有「雉有十四種」格說法。野雞羽毛鮮艷、漂亮非常，戲裏廂格武生、武旦穿大靠辰光插勒頭浪格翎子，就是用野雞尾巴做格。

　　最早格辰光，「野雞」並勿是貶義詞，就連著名格劉四老爺（劉邦）格家小亦叫「雉」，俚哚家姓「呂」，所以名字亦叫「呂雉」。該個女人麼，實頭是格「女強人」，劉四老爺格天下麼，但有有一半要歸功撥俚格囁。不過該篇文章說格是「弱女子」，就勿起談俚哉。

　　說到上海灘格野雞麼，就勿對哉，嘸沒漂漂亮亮格意思，只剩點討惹厭哉。「野雞」迭個詞勒上海閑話裏麼，一向勿是啥好麼事，經常用來指「勿正宗」格推扳貨。譬如有種專門讓考勿取大學格人讀格學堂，收費麼巨來西，教麼亦勿教點啥，文憑倒是好混一張，該格學堂麼上海閑話就叫做「野雞大學」。再譬如有種貨色，來路勿明、質量搭僵，該種麼事就撥人家叫做「野雞貨」。

　　關歇辰光格上海，已經有了新式格市政管理，各行各業全要捐仔照會麼再好做生意，有點黃包車分（未）領照會私下拉客麼，就被叫「野雞車」，就是該歇「差頭」格「黑車」，有辰光依然被叫做「野雞車」。

　　還有種野雞更加推扳，清光緒初刊印格《滬游雜記》中有實梗格記載：「有無業游民持扁擔繩索立十字街口，為人挑行李。稍一疏忽，即至遠飆，俗名『野雞』。近來小車盛行，野雞之肩挑者較少，惟輪船碼頭尚有此輩……或猝遇野雞，要當心，隨處留心，言明挑值，庶不受需索之患耳。」該種「野雞生意」麼現在車站、碼頭還有，大家一定要當心。

　　上海開埠後，租界允許妓女開業，前提是要領仔照會麼再好接客，於是關點嘸沒領過照會的妓女，亦被叫做「野雞」，而嫖野雞，則被叫做「打野雞」。《淞隱漫錄》中有記載：「近有所謂『打野雞者』，抹粉塗脂，奇形怪狀，花街柳陌，扶婢閑行，往往借一榻之煙霞，訂三更之雲雨；客意既屬，則遙指紅樓是妾家，不難尋蹤而至，較女堂倌之惡習，殆有甚焉。為人上者，奈何竟充耳不聞哉!」

　　野雞嘸沒照會，勿能掛牌營業，別人勿曉得麼，野雞隻好自家到馬路浪拉人哉啘。每天夜到天一黑麼，四馬路浪就立仔交關野雞，該點野雞實頭是勿票標幟咯，要是標致仔麼亦不用去野雞，大可以擺仔房間做「長三」或是「么二」勒。實頭嘸沒辦法，只好粉麼塌得厚點，眉毛麼畫得彎點，還好夜到看勿清爽，騙騙人麼是啦哉。

　　交關野雞，或者自家，或者屋里人欠仔債還勿出，就拿該人女人賣撥仔老鴇，野雞拉勿著客，老鴇就嘸撥銅鈿，格麼就打野雞，野雞怕打，只好賣力拉客。作孽是實頭作孽格囁，勿管颳風落雨，三九天落大雪，三伏天起颱風，一到夜裏麼，野雞就要立勒馬路浪拉客。野雞拉客，獨剩拉點鄉下人，說關格辰光，有點鄉下人被野雞拖到仔弄堂裏麼，三五格人一淘上，硬仔仔拿個鄉下人拖到窯子裏，就算勿哪麼，也定其要搞落兩鈿才能脫身。

　　勿單實梗，該點野雞還要「實行抬鄉下人的麻糕，以引起男子的性欲狂」（汪仲賢《上海俗語圖說》），耐看阿有實梗格窮凶極惡，醜態百出。

　　野雞檔次低，俚哚格客人亦是嘸啥銅鈿格「鄉下人」，外地來格小商人和販夫走卒，稍微有點身份格人，怕「失落仔自家格身價」，是萬萬看勿上野雞格。而且野雞亦勿會去拉衣裳挺刮一看就銅鈿格人。作啥？該裏有格道理格，有銅鈿人「懂經」，野雞拉俚哚，俚哚勿會跟仔進弄堂，只會朝馬路當中一走喊外國巡捕。外國巡捕看到去野雞是要用橡皮警棍打格，所以野雞勿拉有銅鈿人，弄得勿好銅鈿嘸沒賺著還要喫生活得咧。

　　一直說野雞推扳，格麼到底推扳得哪哼呢？野雞到底啥價鈿呢？勒浪1932年格辰光，是「一炮」一塊，「包夜」七塊，關格辰光用格是銀洋鈿，一塊銀洋鈿折庫平銀子七錢二分，老秤一斤十六兩，一兩就是31.25克，七錢二分麼大約為22.5克，照仔該歇格萬國銀價麼一盎司七塊美金勿到點算，一塊銀洋鈿終割著該歇人民幣四十塊出頭。

　　但是當時辰光格收嘸沒現在好，所以銀子要比該歇實實值銅鈿囁。三四十年代時，工人平均工資是十六塊，女工是十二塊，關個有名格藍萍，就是後來做仔「國母」格江青搭仔明星秦怡麼，亦衹有六十塊一個月。關格辰光，一塊洋鈿好買八斤肉，的確要比現在格四十元人民值銅鈿。

　　說到收入，讓倪想起魯迅來，大家只曉得俚是無產階級知識分子，爭曉得俚是有銅鈿得勿得了。俚當時格辰光，1931年收入8909塊，1932年是4788塊，1933年則有10300塊，算是有銅鈿得勿得了，俚從1924年到1936年格十二年裏，收入折算到現在要有437萬得勒，耐說阿算無產階級格囁？

　　關歇工人四口之家，每月格開銷約莫40塊，照實梗算來野雞的確賺得勿多。根據1948年對500名各階層妓女格調查，平均每月「做工」十趟到三十趟，有的甚至說有六十趟，但總格來說麼，實頭嘸撥多少。關歇胡適每千字三元，郭沫若每千字四塊，而梁啟超更有每千字廿塊得咧。實梗看來，讀書人的確是不屑於嫖野雞格，還是因為該個緣故麼，關歇格讀書獨剩寫點「長三」、「么二」格事體，關點流傳至令格作品、資料中，對野雞的描寫實頭嘸沒多少，只好從零星格資料裏，得窺一斑了。

　　野雞已經算得推扳了，啥曉得還有加二推扳格，下轉再說吧。

　　許多朋友和我說「耐迭格人哪哼實梗格，說出閑話勿算數，撥大家喫空心湯糰，賽過放屁麼是啦哉。」我倒詫異起來，細問方知還是這「喫喝嫖賭」的文債。其實，我拖到現在，一來是由於俗事煩身，二來亦是要做些準備工作，查些資料，做些筆記，才不致於唐突了佳人，糊弄了大家。

　　關於這「嫖」的部分，思前想後，腹稿也打了不少，終於水到渠成，可以一點點地寫出來與大家分享了，衹是還有一件事情，要與大家說好。

　　這件事說來也好玩，是我打算做的一個嘗試，用方言來寫。這個言就是蘇白，蘇州白話。老上海，花界的通用語言，或者說標準語言，甚至官方語言就是蘇白，亦就是平常說書裏聽到的說白。如果聽不懂蘇白，就別想在上海灘的花界混，所以這部分的文章，就「定規」要用蘇白來寫了。

　　衹能委屈了非吳地方言圈的朋友了，然而即使我用普通話寫了出來，沒有從小受到吳地方言熏陶過的朋友，還是萬萬不能領會到其中的風流的的，所以衹能犧牲了這些讀者了，或許以後得空，再譯成官白吧。

　　該篇文章從羅搭說起囁？就從前兩日幾個網浪格朋友叫倪做格題目說起罷。該格題目囁，倒是網浪交關流行格，叫做「上海話八級考試」，其中有一道是實梗格：「四馬路的女人，在上海的原意是指……」，要求勒浪四個答案「蠻橫無禮的女人」、「見過世面的女人」、「失身柳巷的女人」和「猥祟卑鄙的女人」中選一個，該點網浪格朋友全勿曉得，就來問倪。

　　四馬路，就是該歇格福州路，從前南京路、九江路、漢口路、福州路分別被叫做大馬路、二馬路、三馬路和四馬路，關格辰光延安路還是一條河泊，不過關條河泊麼實頭名氣大得響噹噹，叫做「洋涇浜」，勿單全國聞名，亦是世界聞名格囁。格麼四馬路格女人到底哪哼囁？應該就是「失身柳巷的女人」，聽倪慢慢說來。

　　「柳巷」一詞，並勿是指山西太原格大、小柳巷，亦勿是說江蘇泗洪縣格大、小柳巷，關面格柳巷全是因巷里種著無數楊枊而得名格。該道題目裏格柳巷，是嘸沒楊柳樹咯囁。勒哚蘇州，養育巷南面格東首，有兩條併排並格弄堂，一條叫做「花街巷」，另外一條稍微長一點格，則叫做「柳巷」。該格勿是倪瞎說剔出，明代大學士王鏊修格《姑蘇誌》浪已經有記載，少算算麼亦有五百多年哉。勿要講關歇，便是該歇麼，蘇州依然有實梗兩條小路囁。

　　關歇養育巷南面格街浪，分別有蘇州府衙門和道台衙門，就是關歇辰光格政府所在。俗說說得好「衙門八字朝南開，有禮嘸錢分（不）進來」，所以該格府前街、道前街全是東西走向，與養育巷成勒一個「丁」字。

　　關辰光格政府，是一百樣全管格，牽涉到幾幾花花人嘎，關點人到政府辦事體麼，全住勒附近，而「花街巷」與「柳巷」麼，就像現在格商業街實梗，開仔交關客棧啊。堂子啊，供旅客遊樂，說仔麼，就是紅燈區啘。於是，尋妓女，後來也被叫做「尋花問柳」說格就是該出典故。

　　「失身柳巷的女人」指格就是妓女，以前上海灘格四馬路就是堂子出名，阿有幾花妓女呢？據1915年上海公共租界工部局正俗科格調查，當時有「長三」1229人，「么二」505人，「野雞」4727人，「花煙間」妓女1050人，關點還只不過是「查得著」格，還有許許多多「查勿著」格，加在一起要多得多囁。

　　該歇格來福士廣場，就是關歇格新會樂裏，短短格一條弄堂，就是擺勒該歇麼沿牢西藏路從福州路走到漢口路亦不過三五分鐘，倒勿殼張關歇格辰光倒有在冊妓院151家，妓女587個之多囁，耐看阿海威勒勿海威？

　　勿單是新會樂裏，福建路朝西，還有普慶裏、同慶裏、久安裏、兆富裏、兆貴裏、迎春坊、西安坊等等交關弄堂，全部開仔妓院接客，耐想關格辰光，上海有百分之九十二格外來人口，當時辰光，勿象現在女人亦出來「打天下」，關歇衹有男人出來「跑碼頭」，長期往勒外勢麼，男人阿殼張有勿「花差差」格？四馬路就是頂頂好格去處哉。

　　四馬路並勿長，但是四馬路浪格女人各式各樣，有勿勿少少檔次得來，下轉再說吧。